Le poesie stabiesi

 

 

'Mmiez''a Villa Comunale

 

‘Nu pomeriggio, dint’‘a staggione,

m’aggio assettato ‘ncopp’a ‘na panchina,

‘mmiez’‘a Villa Comunale,

‘e rimpetto ‘o monumento ‘e Denza.

‘Nu poco p’‘a stanchezza, ‘nu poco p’‘o calore,

m’aggio appapagnato; a bell’e bbuono,

sento cierti voce areto a me…

“Che ce vuò fà’, caro Gigino,

‘e tiempe so’ cagnate,

oggi ci sono altri interessi, altri ideali.”

“Sì, va bbuò, ma Rafele mio,

ccà nun se capisce niente cchiù!

Era meglio si nun m’‘o facevano stu monumento,

almeno nun ‘e vedevo tanti cose storte!”

“Giggì tu nun te vuò fà’ capace,

ca ogne epoca tene i suoi pro e i suoi contro;

pure ‘e tiempe nuoste ce steveno ‘e prubbleme,

erano ‘e ‘n’atu genere, ma sempe prubbleme erano.

Tu devi essere ‘nu poco cchiù ottimista,

nun guardà’ sulo ‘o mmalamente,

guarda pure chello ca ce sta ‘e bbuono;

sta città ave bisogno ‘e gente onesta,

‘e gente labboriosa, gente ca tene voglia ‘e fà’,

e credime sta gente ce sta,

ave bisogno sulo ‘e ‘n’opportunità!”

 

 

 

 

( Autore: Bonuccio Gatti - © Copyright 2006 www.bogat.it  )